?ifaisium

Codex Ambrosianus B, based on transcription by Project Wulfila, in turn based on Streitberg (1919).
Verses 4:6 – 4:16 and 5:17 – 5:29 from Ambr. A. Non-preserved verses 5:30 – 6:8 translated by Roel.
Commercial use limited. Punctuation and extratextual conventions differ from the manuscripts.

Latin Wulfilan

1–2 Pawlus apaustaulus xristaus Ïesuis þairh wiljan gudis þaim weiham þaim wisandam ïn Aifaison jah triggwaim ïn xristau Ïesu · Ansts ïzwis jah gawairþi fram guda attin unsaramma jah fraujin Ïesu xristau :
3–14 þiuþiþs Guþ jah atta fraujins unsaris Ïesuis xristaus ïzei gaþiuþida uns ïn allai þiuþeinai ahmeinai ïn himinakundaim ïn xristau swaswe gawalida unsis ïn ïmma faur gasatein fairƕaus ei sijaima weis weihai jah unwammai ïn andwairþja ïs ïn friaþwai · Fauragarairoþ uns du suniwe gadedai þairh Ïesu xristu ïn ïmma bi leikainai wiljins seinis du hazeinai wulþaus anstais seinaizos ïn þizaiei ansteigs was uns ïn þamma liubin sunau seinamma · Ïn þammei habam faurbauht fralet frawaurhte þairh bloþ ïs bi gabein wulþaus anstais ïs þoei ufarassau ganohida ïn uns ïn allai handugein jah frodein kannjan unsis runa wiljins seinis bi wiljin saei fauragaleikaida ïmma du fauragaggja usfulleinais mele aftra usfulljan alla ïn xristau · þo ana himinam jah ana airþai ïn ïmma · Ïn þammei hlauts gasatidai wesum fauragaredanai bi wiljin gudis þis alla ïn allaim waurkjandins bi muna wiljins seinis ei sijaima weis du hazeinai wulþaus ïs þai faurawenjandans ïn xristau · Ïn þammei jah jus gahausjandans waurd sunjos aiwaggeli ganistais ïzwaraizos · þammei galaubjandans gasiglidai waurþuþ ahmin gahaitis þamma weihin ïzei ïst wadi arbjis unsaris du faurbauhtai gafreideinais du hazeinai wulþaus ïs :
15-23 Duþþe jah ïk gahausjands ïzwara galaubein ïn fraujin Ïesu xristau jah friaþwa ïn allans þans weihans unsweibands awiliudo ïn ïzwara gamund waurkjands ïn bidom meinaim · Ei Guþ fraujins unsaris Ïesuis xristaus atta wulþaus gibai ïzwis ahman handugeins jah andhuleinais ïn ufkunþja seinamma ïnliuhitida augona hairtins ïzwaris ei witeiþ jus ƕa ïst wens laþonais ïs wileiku gabei wulþaus arbjis ïs ïn weihaim · Jah ƕa ufarassus mikileins mahtais ïs ïn uns þaim galaubjandam · Bi waurstwa mahtais swinþeins ïs þatei gawaurhta ïn xristau urraisjands ïna us dauþaim jah gasatida ïn taihswon seinai in himinam ufaro allaize reikje jah waldufnje jah mahte jah fraujinassiwe jah allaize namne namnidaize ni þatainei ïn þamma aiwa ak jah ïn þamma anawairþin · Jah all ufhnaiwida uf fotuns ïmma jah ïna atgaf haubiþ ufar alla aikklesjon sei ïst leik ïs fullo þis alla ïn allaim usfulljandins :
?  
1-3 Jah ïzwis wisandans dauþans missadedim jah frawaurhtim ïzwaraim · Ïn þaimei simle ïddjeduþ bi þizai aldai þis aiwis · Bi reik waldufnjis luftaus · Ahmins þis nu waurkjandins ïn sunum ungalaubeinais · Ïn þaimei jah weis allai usmetum suman ïn lustum leikis unsaris taujandans wiljans leikis jah gamitone jah wisum wistai barna hatis swaswe jah þai anþarai :
4-7 Ïþ Guþ gabeigs wisands ïn armahairtein ïn þizos managons frijaþwos ïn þizaiei frijoda uns jah wisandans uns dauþans frawaurhtim miþgaqiwida uns xristau · Anstai sijum ganasidai · Jah miþurraisidai jah miþgasatidai ïn himinakundaim ïn xristau Ïesu ei ataugjai ïn aldim þaim anagaggandeim ufarassu gabeins anstais seinaizos ïn selein bi uns ïn xristau Ïesu :
8-10 Unte anstai sijuþ ganasidai þairh galaubein · Jah þata ni us ïzwis ak gudis giba ïst · Ni us waurstwam ei was ni ƕopai · Ak ïs sijum taui gaskapanai ïn xristau Ïesu du waurstwam godaim þoei fauragamanwida Guþ ei ïn þaim gaggaima :
11-12 Duþþe gamuneiþ þatei jus þiudos simle wesuþ ïn leika þai namnidans unbimaitanai fram þizai namnidon bimait ïn leika handuwaurht · Unte wesuþ þan ïn jainamma mela ïnuh xristu framaþjai usmetis Ïsraelis jah gasteis gahaite trausteis · Wen ni habandans jah gudalausai ïn manasedai :
13 Ïþ nu sai ïn xristau Ïesu jus juzei simle wesuþ fairra waurþuþ neƕa ïn bloþa xristaus :
14-18 Sa auk ïst gawairþi unsar saei gatawida þo ba du samin jah miþgardawaddju faþos gatairands fijaþwa ana leika seinamma witoþ anabusne garaideinim gatairands ei þans twans gaskopi ïn sis silbin du ainamma niujamma mann waurkjands gawairþi · Jah gafriþodedi þans bans ïn ainamma leika guda þairh galgan afslahans fijaþwa ïn sis silbin · Jah qimands wailamerida gawairþi ïzwis juzei fairra jah gawairþi þaim ïzei neƕa · Unte þairh ïna habam atgagg bajoþs ïn ainamma ahmin du attin :
19 Sai nu ju ni sijuþ gasteis jah aljakonjai ak sijuþ gabaurgjans þaim weiham jah ïngardjans Gudis · Anatimridai ana grunduwaddjau apaustaule jah praufete at wisandin auhumistin waihstastaina silbin xristau Ïesu · Ïn þammei alla gatimrjo gagatiloda wahseiþ du alh weihai ïn fraujin · Ïn þammei jah jus miþgatimridai sijuþ du bauainai Gudis ïn ahmin :
Γ  
1-7 Ïn þizozei waihtais ïk Pawlus bandja xristaus Ïesuis ïn ïzwara þiudo jabai sweþauh hausideduþ fauragaggi Gudis anstais sei gibana ïst mis ïn ïzwis unte bi andhuleinai gakannida was mis so runa · Swe fauragamelida ïn leitilamma · Duþþe ei siggwandans mageiþ fraþjan frodein meinai ïn runai xristaus · þatei anþaraim aldim ni kunþ was sunum manne swaswe nu andhuliþ ïst þaim weiham ïs apaustaulum jah praufetum ïn ahmin · Wisan þiudos gaarbjans jah galeikans jah gadailans gahaitis ïs ïn xristau Ïesu þairh aiwaggeljon · þizozei warþ andbahts ïk bi gibai anstais Gudis þizai gibanon mis bi toja mahtais ïs :
8-11 Mis þamma undarleijin allaize þize weihane atgibana warþ ansts so ïn þiudom wailamerjan þo unfairlaistidon gabein xristaus · Jah ïnliuhtjan allans ƕileik þata fauragaggi runos þizos gafulginons fram aiwam ïn Guda þamma alla gaskapjandin ei kanniþ wesi nu reikjam jah waldufnjam ïn þaim himinakundam þairh aikklesjon so managfalþo handugei Gudis bi muna aiwe þanei gatawida ïn xristau Ïesu fraujin unsaramma :
12 Ïn þammei habam balþein jah atgagg ïn trauainai þairh galaubein ïs :
13 Ïn þize bidja ni wairþaiþ usgrudjans ïn aglom meinaim faur ïzwis þatei ïst wulþus ïzwar :
14-19 Ïn þis biuga kniwa meina du attin fraujins unsaris Ïesuis xristaus us þammei all fadreinis ïn himina jah ana airþai namnjada ei gibai ïzwis bi gabein wulþaus seinis mahtai gaswinþnan þairh ahman seinana ïn ïnnuman mannan bauan xristu þairh galaubein ïn hairtam ïzwaraim ei ïn friaþwai gawaurhtai jah gasulidai mageiþ gafahan miþ allaim þaim weiham ƕa sijai braidei jah laggei jah hauhei jah diupei kunnan þo ufarassau mikilon þis kunþjis friaþwa xristaus ei fullnaiþ du allai fullon Gudis :
20-21 Aþþan þamma mahteigin ufar all taujan maizo þau bidjam aiþþau fraþjam bi mahtai þizai waurkjandein ïn uns · Ïmma wulþus ïn aikklesjon ïn xristau Ïesu ïn allos aldins aiwe : Amen
?  
1-6 Bidja nu ïzwis ïk bandja ïn fraujin wairþaba gaggan þizos laþonais þizaiei laþodai sijuþ miþ allai hauneinai jah qairrein miþ usbeisnai usþulandans ïzwis misso ïn friaþwai usdaudjandans fastan ainamundiþa ahmins in gabundjai gawairþeis ·
Ain leik jah
ains ahma ·
Swaswe atlaþodai sijuþ ïn aina wen laþonais ïzwaraizos ·
Ains frauja
aina galaubeins
aina daupeins
ains guþ jah atta allaize ·
Saei ufar allaim jah and allans jah ïn allaim uns :
7-8 Ïþ ainƕarjammeh unsara atgibana ïst ansts bi mitaþ gibos xristaus ïn þizei qiþiþ · Ussteigands ïn hauhiþa ushanþ hunþ jah atuhgaf gibos mannam :
9 þatuþ þan usstaig · Ƕa ïst niba þatei jah atstaig faurþis ïn undaraisto airþos··
10-16 Saei atstaig sa ïst jah saei usstaig ufar allans himinans ei usfullidedi allata · Jah silba gaf sumans apaustauluns sumanzuþ þan praufetuns sumansuþ þan aiwaggelistans sumansuþ þan hairdjans jah laisarjans du ustauhtai weihaize du waurstwa andbahtjis du timreinai leikis xristaus · Unte garinnaima allai ïn ainamundiþa galaubeinais jah ufkunþjis sunus Gudis du waira fullamma ïn mitaþ wahstaus fullons xristaus ei þanaseiþs ni sijaima niuklahai uswagidai jah uswalugidai winda ƕammeh laiseinais liutein manne ïn filudeisein du listeigon uswandjai airzeins · Ïþ sunja taujandans ïn frijaþwai wahsjaima ïn ïna þo alla ïze ïst haubiþ xristus us þammei all leik gagatiloþ gagahaftiþ þairh allos gawissins andstaldis bi waurstwa ïn mitaþ ana ainƕarjoh fero uswahst leikis taujiþ du timreinai seinai ïn frijaþwai :
17-20 þata nu qiþa jah weitwodja ïn fraujin ei þanaseiþs ni gaggaiþ swaswe jah anþaros þiudos gaggand ïn uswissja hugis seinis riqizeinai gahugdai wisandans framaþjai libainais gudis ïn unwitjis þis wisandins ïn ïm ïn daubiþos hairtane seinaize · þaiei uswenans waurþanai sik silbans atgebun aglaitein ïn waurstwein unhrainiþos allaizos ïn faihufrikein ·
Ïþ jus ni swa ganemuþ xristu :
21-24 Jabai sweþauh ïna hausideduþ jah ïn ïmma uslaisidai sijuþ swaswe ïst sunja ïn Ïesu ei aflagjaiþ jus bi frumin usmeta þana fairnjan mannan þana riurjan bi lustum afmarzeinais anuþ þan niujaiþ ahmin fraþjis ïzwaris jah gahamoþ þamma niujin mann þamma bi guda gaskapanin ïn garaihtein jah weihiþai sunjos :
25-30 Ïn þizei aflagjandans liugn rodjaiþ sunja ƕarjizuh miþ neƕundjin seinamma unte sijuþ anþar anþaris liþus ·
þwairhaiþ þan sijaiþ jah ni frawaurkjaiþ · Sunno ni disiggqai ana þwairhein ïzwara ·
Nih gibaiþ staþ unhulþin ·
Saei hlefi þanaseiþs ni hlifai ak mais arbaidjai · Waurkjands swesaim handum þiuþ ei habai dailjan þaurbandin ·
Ainhun waurde ubilaize us munþa ïzwaramma ni usgaggai ak þatei goþ sijai du timreinai galaubeinais ei gibai anst hausjandam ·
Jah ni gaurjaiþ þana weihan ahman Gudis þammei gasiglidai sijuþ ïn daga uslauseinais ·
31-32 Alla baitrei · Jah hatis · Jah þwairhei · Jah hrops · Jah wajamereins afwairpaidau af ïzwis miþ allai unselein · Wairþaiduh miþ ïzwis misso seljai · Armahairtai fragibandans ïzwis misso swaswe Guþ ïn xristau fragaf ïzwis :
?  
1-2 Wairþaiþ nu galeikondans Guda swe barna liuba jah gaggaiþ ïn friaþwai swaswe jah xristus frijoda uns jah atgaf sik silban faur uns hunsl jah sauþ Guda du daunai woþjai :
3-4 Aþþan horinassus jah allos unhrainiþos aiþþau faihufrikei nih namnjaidau ïn ïzwis swaswe gadob ïst weihaim · Aiþþau aglaitiwaurdei aiþþau dwalawaurdei aiþþau saldra þoei du þaurftai ni fairrinnand ak mais awiliuda :
5 þata auk witeiþ kunnandans þatei ƕazu hors aiþþau unhrains aiþþau faihufriks · þatei ïst galiugagude skalkinassaus · Ni habaiþ arbi ïn þiudangardjai xristaus jah gudis :
6-7 Ni manna ïzwis uslusto lausaim waurdam þairh þoei qimiþ hatis Gudis ana sunum ungalaubeinais ·
Ni wairþaiþ nu gadailans ïm :
8-11a Wesuþ auk suman riqiz ïþ nu liuhaþ ïn fraujin · Swe barna liuhadis gaggaiþ · Aþþan akran liuhadis ïst ïn allai selein jah garaihtein jah sunjai · Gakiusandans þatei sijai waila galeikaiþ fraujin jah ni gamainjaiþ waurstwam riqizis · · ·
 
 
17-21 · · · Duþþe ni wairþaiþ unfrodai ak fraþjandans ƕa sijai wilja fraujins · Jah ni anadrigkaiþ ïzwis weina ïn þammei ïst usstiurei ak fullnaiþ ïn ahmin · Rodjandans ïzwis ïn psalmom jah hazeinim jah saggwim ahmeinaim siggwandans ïn hairtam ïzwaraim fraujin · Awiliudondans sinteino fram allaim ïn namin fraujins unsaris Ïesuis xristaus attin jah Guda ufhausjandans ïzwis misso ïn agisa xristaus :
22-24 Qenes seinaim abnam ufhausjaina swaswe fraujin · Unte wair ïst haubiþ qenais swaswe jah xristus haubiþ aikklesjons jah ïs ïst nasjands leikis · Akei swaswe aikklesjo ufhauseiþ xristu swah qenes abnam seinaim ïn allamma :
25-27 Jus wairos frijoþ qenins ïzwaros swaswe jah xristus frijoda aikklesjon jah sik silban atgaf faur þo ei þo gaweihaidedi gahrainjands þwahla watins in waurda ei ustauhi silba sis wulþaga aikklesjon ni habandein wamme aiþþau maile aiþþau ƕa swaleikaize ak ei sijai weiha jah unwamma :
28-29 Swa jah wairos skulun frijon seinos qenins swe leika seina · Saei seina qen frijoþ jah sik silban frijoþ · Ni auk manna ƕanhun sein leik fijaida ak fodeiþ ïta jah warmeiþ swaswe jah xristus aikklesjon · · ·
? Verses 1-7 translated by Roel.
1-3 Barna ufhausjaiþ berusjos ïzwara ïn fraujin · þata auk raiht ïst · Sweraiþ atta þeins jah aiþei þeina · þatei ïst frumisto anabusns ïn gahaita ei waila þu wairþai jah sijais lagga ƕeila ana airþai :
4 Attans · Ni ïnaljanoþ barna ïzwara ak fodeiþ ïns ïn laisenai faur Fraujan :
5-8 Skalkans · Ufhauseiþ reikans ïn leika ogjands jah reirands ïn ainfalþai hairtins ïzwaros swaswe du xristau · Ni bi ussaiƕa swa manna saei wili galeikan mans ak swe skalks xristaus taujands wilja Gudis fram saiwalai miþ gudawiljin swe skalkinonds fraujin nih mannam · Kunnands ei ƕana ainƕarjizuh taujiþ þiuþis þata ganimiþ at fraujin jaþþe skalks jaþþe freis :
9 Jah jus fraujans þata samo taujaiþ wiþra ïns fraletandans ïm ƕotos witandans þatei ïm jah ïzwis sama frauja ïst ïn himinam jah wiljahalþei nist at ïmma :
10-12 þata nu anþar broþrjus meinai inswinþjaiþ ïzwis ïn fraujin jah ïn mahtai swinþeins ïs · Gahamoþ ïzwis sarwam Gudis ei mageiþ standan wiþra listins diabulaus · Unte nist ïzwis brakja wiþra leik jah bloþ ak wiþra reikja jah waldufnja · Wiþra þans fairƕu habandans riqizis þis · Wiþra þo ahmeinona unseleins ïn þaim himinakundam :
13-17 Duþþe nimiþ sarwa Gudis ei mageiþ andstandan ïn þamma daga ubilin jah ïn allamma uswaurkjandans standan · Standaiþ nu ufgaurdanai hupins ïzwarans sunjai jah gapaidodai brunjon garaihteins · Jah gaskohai fotum ïn manwiþai aiwaggeljons gawairþjis · Ufar all andnimandans skildu galaubeinais þammei maguþ allos arƕaznos þis unseleins funiskos afƕapjan · Jah hilm naseinais nimaiþ jah meki ahmins þatei ïst waurd Gudis :
18-20 þairh allos aihtronins jah bidos aihtrondans ïn alla mela ïn ahmin jah du þamma wakandans sinteino ïn allai usdaudein jah bidom fram allaim þaim weiham · Jah fram mis ei mis gibaidau waurd ïn usluka munþis meinais ïn balþein kannjan runa aiwaggeljons · Faur þoei airino ïn kunawidom ei ïn ïzai gadaursjau swe skuljau rodjan :
21-22 Aþþan ei jus witeiþ ƕa bi mik ïst ƕa ïk tauja kanneiþ ïzwis allata Twkeikus sa liuba broþar jah triggwa andbahts ïn fraujin · þanei ïnsandida du ïzwis duþþe ei kunneiþ ƕa bi mik ïst jah gaþrafstjai hairtona ïzwara :
23-24 Gawairþi broþrum jah friaþwa miþ galaubeinai fram Guda attin jah fraujin Ïesu xristau · Ansts miþ allaim þaiei frijond fraujan unsarana Ïesu xristu ïn unriurein : Amen

Leave a Reply

Your email address will not be published. Required fields are marked *