·?· Teimauþaius

Codex Ambrosianus A based on transcription by Project Wulfila and Streitberg (1919).
Commercial use limited. Punctuation and extratextual conventions differ from the manuscript.

Latin Wulfilan

1-2 Pawlus apaustaulus xristaus Ïesuis bi anabusnim gudis nasjandis unsaris jah xristaus Ïesuis wenais unsaraizos Teimauþaiau walisin barna ïn galaubeinai · Ansts armaio gawairþi fram Guda attin jah xristau Ïesu fraujin unsaramma :
3-4 Swaswe baþ þuk saljan ïn Aifaison galeiþands Makedonais ei faurbiudais sumaim ei anþarleiko ni laisjaina · Niþþan atsaiƕaina spille jah gabaurþiwaurde andalausaize þoei soknim andstaldand mais þau timreinai gudis þizai wisandein ïn galaubeinai :
5-7 Aþþan andeis ïst anabusnais friaþwa us hrainjamma hairtin jah miþwissein godai jah galaubeinai unhindarweisai af þaimei sumai afairzidai uswandidedun du lausawaurdein wiljandans wisan witodalaisarjos nih fraþjandans nih ƕa rodjand nih bi ƕa stiurjand :
8-10 Aþþan witum þatei goþ ïst witoþ, jabai ƕas ïs witoda brukeiþ · Witands þatei garaihtamma nist witoþ satiþ ak witodalausaim jah untalaim jah unsibjaim jah frawaurhtaim jah unairknaim jah usweihaim attans bliggwandam jah aiþeins bliggwandam mannans maurþrjandam horam mannans gaþiwandam liugnjam ufarswaram jah jabai ƕa aljis þizai hailon laiseinai andstandiþ :
11 Sei ïst bi aiwaggeli wulþaus þis audagins gudis þatei gatrauaiþ ïst mis :
12-13 Jah awiliudo þamma ïnswinþjandin mik xristau Ïesu fraujin unsaramma unte triggwana mik rahnida gasatjands ïn andbahtja ïkei faura was wajamerjands jah wraks jah ufbrikands akei gaarmaiþs was unte unwitands gatawida ïn ungalaubeinai :
14-17 Ïþ ufarassiþ ansts fraujins miþ galaubeinai jah friaþwai þizai ïn xristau Ïesu · Triggw þata waurd jah allaizos andanumtais wairþ þatei xristus Ïesus qam ïn þamma fairƕau frawaurhtans nasjan þizeei frumists ïm ïk · Akei duþþe gaarmaiþs warþ ei ïn mis frumistamma ataugidedi xristaus Ïesus alla usbeisnein du frisahtai þaim ïze anawairþai wesun du galaubjan ïmma du libainai aiweinon · Aþþan þiudana aiye unriurjamma · ungasaiƕanamma · ainamma frodamma guda sweriþa jah wulþus ïn aldins aiwe · Amen :
18-20 þo anabusn anafilha þus barnilo Teimauþaiu bi þaim faura faursniwandam ana þuk praufetjam ei driugais ïn þaim þata godo drauhtiwitoþ habands galaubein jah goda miþwissein · þizaiei sumai afskiubandans bi galaubein naqadai waurþun þizeei ïst Hwmainaius jah Alaiksandrus þanzei anafalh Satanin ei gatalzjaindau jah ni wajamerjan :
?  From Codex Ambrosianus A
1-2 Bidja nu frumist allis taujan bidos aihtronins liteinins awiliuda fram allaim mannam fram þiudanam jah fram allaim þaim ïn ufarassau wisandam ei slawandein jassutja ald bauaima ïn allai gagudein jaggariudja :
3-7 þatuþþan ïst god jah andanem ïn andwairþja nasjandis unsaris gudis saei allans mans wili ganisan jah ïn ufkunþja sunjos qiman · Ains allis guþ · Ains jah midumonds gudis jah manne · Manna xristus Ïesus sa gibands sik silban andabauht faur allans þizei weitwodein melam swesaim du þammei gasatiþs ïm ïk merjands jah apaustaulus sunja qiþa ïn xristau ni liuga laisareis þiudo ïn galaubeinai jassunjai :
8 Wiljau nu wairans bidjan ïn allaim stadim ushafjandans swiknos handuns ïnuh þwairhein jah tweiflein :
9-10 Samaleiko jah qinons ïn gafeteinai hrainjai miþ gariudein jah ïnahein fetjandeins sik ni ïn flahtom aiþþau gulþa aiþþau marikreitum aiþþau wastjom galaubaim ak þatei gadob ïst qinom gahaitandeim guþ blotan þairh waurstwa goda :
11 Qino ïn hauniþai galaisjai sik ïn allai ufhauseinai :
2:12-3:1a Ïþ galaisjan qinon ni uslaubja nih fraujinon faura waira ak wisan ïn þahainai · Adam auk fruma gadigans warþ þaþroh Aiwwa jah ?dam ni warþ uslutoþs ïþ qino uslutoda ïn missadedai warþ · Ïþ ganisiþ þairh barne gabaurþ jabai gastandand ïn galaubeinai jah frijaþwai jah weihiþai miþ gafraþjein · Triggw þata waurd :
Γ  From Codex Ambrosianus A, except weinnas and ufhausjandona.
1b Jabai ƕas aipiskaupeins gairneiþ godis waurstwis gairneiþ :
2-7 Skal nu aipiskaupus ungafairinonds wisan
· Ainaizos qenais aba
· Andaþahts

· Gariuds
· Froþs
· Gafaurs
· Gastigods
· Laiseigs
· Ni weinnas
· Nisslahuls ak sutis
· Qairrus
ni sakuls
· Ni faihufriks ·
Seinamma garda waila fauragaggands barna habands ufhausjandona miþ allai anawiljein · Ïþ jabai ƕas seinamma garda fauragaggan ni mag ƕaiwa aikklesjon gudis gakaroþ··
· Nih niujasatidana ïbai aufto ufarhauhiþs ïn stauai atdriusai unhulþins
· Skal auk ïs weitwodiþa goda haban fram þaim uta ei ni atdriusai in idweit jah hlamma unhulþins :
8-9 Jah swa diakaununs gariudans
· Nih faihufrikans
· Ni weina filu haftjandans
· Nih aglaitgastaldans
· Habandans runa galaubeinais ïn hrainjai gahugdai ·
10-13 Jaþþai þan gakiusaindau frumist jasswa andbahtjaina
· Ungafairinodai wisandans
· qinons samaleiko gariudos
    · Ni diabulos
    · Gafaurjos
    · Triggwos ïn allamma
· Diakaunjus sijaina ainaizos qenais abans
· Barnam waila fauragaggandans jah seinaim gardim ·
þai auk waila andbahtjandans grid goda sis fairwaurkjand jah managa balþein galaubeinai þizai ïn xristau Ïesu :
14-16 þata þus melja wenjands qiman at þus sprauto aþþan jabai sainjau ei witeis ƕaiwa skuld ïst ïn garda gudis usmitan · Saei ïst aikklesjo gudis libandins sauls jah tulgiþa sunjos · Jah unsahtaba mikils ïst gagudeins runa
· Saei gabairhtiþs warþ ïn leika
· Garaihts gadomiþs warþ ïn ahmin
· Ataugids warþ þaim aggilum
· Merids warþ ïn þiudom
· Galaubiþs warþ ïn fairƕau
· Andnumans warþ ïn wulþau :
?  From Codex Ambrosianus B
1-3 Aþþan ahma swikunþaba qiþiþ þatei ïn spidistaim dagam afstandand sumai galaubeinai atsaiƕandans ahmane airziþos jah laiseino unhulþono ïn liutein liugnawaurde jah gatandida habandane swesa miþwissein warjandane liugos gaþarban mate þanzei Guþ gaskop du andniman miþ awiliudam galaubjandam jah ufkunnandam sunja :
4-5 Unte all gaskaftais gudis goþ jah ni waiht du uswaurpai miþ awiliudam andnuman gaweihada auk þairh waurd gudis jah bida :
6-7a þata ïnsakands broþrum goþs wairþis andbahts xristaus Ïesuis alands waurdam galaubeinais jah godaizos laiseinais þoei galaistides ïþ þo usweihona swe usalþanaizo spilla biyandei :
7b-10 þroþei þuk silban du gagudein aþþan leikeina usþroþeins du fawamma ïst bruks ïþ gagudein du allamma ïst bruks gahaita habandei libainais þizos nu jah þizos anawairþons · Triggw þata waurd jah allaizos andanumtais wairþ · Duþþe allis arbaidjam jah ïdweitjanda unte wenidedum du guda libandin saei ïst nasjands allaize manne þishun galaubjandane :
11-12 Anabiud þata jah laisei · Ni manna þeinai jundai frakunni ak frisahts sijais þaim galaubjandam
· Ïn waurda
· Ïn usmeta
· Ïn friaþwai
· Ïn galaubeinai
· Ïn swikniþai ·
13-16 Unte qima gaumei saggwa boko gaþlaihtai laiseinai · Ni sijais unkarja þizos ïn þus anstais sei gibana warþ þus þairh praufetjans afar analageinai handiwe praizbwtaireis · þo sido þus ïnuþþaim sijais ei þatei þeihais þu swikunþ sijai allaim · Atsaiƕ du þus silbin jah du laiseinai usdaudo þairhwis ïn þaim þatuh auk taujands jah þuk silban ganasjis jah hausjandans þus :
?  From Codex Ambrosianus B (except verse 7) up to verse 10: jau allamma, then from codex A.
1-2 Seneigana ni andbeitais ak gaþlaih swe attin juggans swe broþruns sineigos swe aiþeins juggos swe swistruns ïn allai swiknein :
3-4 Widuwons swerai þozei bi sunjai sijaina widuwons · Ïþ jabai ƕo widuwono barna aiþþau barne barna habai galaisjaina faurþis swesana gard barusnjan jah andalauni usgiban fadreinam · þata auk ïst god jah andanem ïn andwairþja Gudis :
5-7 Aþþan soei bi sunjai widuwo ïst jah ainakla wenida du guda jah þairhwisiþ ïn bidom nahtam jah dagam ïþ so wizondei ïn azetjam jah libandei dauþa ïst · Jah þata anabiud ei ungafairinodos sijaina ·
8 Aþþan jabai ƕas swesaim þishun ingardjam ni gaþlaihiþ galaubein ïnwidiþ jah ïst ungalaubjandin wairsiza :
9-13 Widuwo gawaljaidau ni mins saihs tigum jere sei wesi ainis abins qens · Ïn waurstwam godaim weitwodiþa habandei jau barna fodidedi jau gastins andnemi jau weihaim fotuns þwohi jau aglons winnandam andbahtidedi jau allamma waurstwe godaize afarlaistidedi · Ïþ juggos widuwons biwandei þan auk gairnidedeina wiþra Xristu liugan wileina habandeins staua unte frumein galaubein wana gatawidedun aþþan samana jah unwaurstwons laisjand sik þairhgaggan gardins aþþan ni þatain unwaurstwons ak jah unfaurjos jah fairweitjandeins rodjandeins þoei ni skulda sind :
14-16 Wiljau nu juggos liugan barna bairan garda waldan · · ·

· · · widuwons andbahtjai ïm jah ni kaurjaidau aikklesjo ei þaim bi sunjai · · ·

17-20 · · · ïn waurda jah ïn laiseinai · Qaþ auk gameleins Auhsau þriskandin munþ ni faurwaipjais · Jah Wairþs sa waurstwa mizdons ïs · Bi praizbwtairein wroh ni andnimais niba ïn andwairþja twadje aiþþau þrije weitwode · Ïþ þans frawaurhtans ïn andwairþja allaize gasak ei jah þai anþarai agis habaina :
21-24 Weitwodja ïn andwairþja Gudis jah fraujins unsaris Ïesuis xristaus jah þize gawalidane aggile ei þata fastais ïnu faurdomein ni waiht taujands bi wiljahalþein · Handuns sprauto ni mannhun lagjais ni gamainja siais frawaurhtim framaþjaim þuk silban swiknana fastais · Ju ni drigkais þanamais wato ak weinis leitil brukjais ïn qiþaus þeinis jah þizo ufta sauhte þeinaizo · Sumaize manne frawaurhteis swikunþos sind faurbisniwandeins du stauai sumaizeh þan jah afargaggand · Samaleiko þan jah waurstwa goda swikunþa sind jah þoei aljaleikos sik habandona filhan ni mahta sind :
?  From Codex Ambrosianus B – spelling of haifsteis corrected from codex A.
1-2 Swa managai swe sijaina uf jukuzjai skalkans seinans fraujans allaizos sweriþos wairþans rahnjaina ei namo fraujins jah laiseins ni wajamerjaidau · Aþþan þaiei galaubjandans haband fraujans ni frakunneina unte broþrjus sind ak mais skalkinona unte galaubjandans sind jah liubai þaiei wailadedais gadailans sind · þata laisei jah gaþlaih :
3-5 Jabai ƕas aljaleiko laisjai jah ni atgaggai du hailaim waurdam þaim fraujins unsaris Ïesuis xristaus jah þizai bi gagudein laiseinai ïþ hauhþuhts ni waiht witands ak siukands bi soknins jah waurdajiukos us þaimei wairþand
· Neiþa

· Maurþra
· Haifsteis
· Anaqisseis
· Anamindeis ubilos
· Usbalþeins frawardidaize manne ahin
at þaimei gatarniþ ïst sunja hugjandane faihugawaurki wisan gagudein :
6-10 Aþþan ïst gawaurki mikil gagudei miþ ganauhin · Ni waiht auk brahtedum ïn þamma fairƕau · Bi sunjai þatei ni usbairan ƕa magum · Aþþan habandans usfodein jah gaskadwein þaimuh ganohidai sijaima · Aþþan þaiei wileina gabigai wairþan atdriusand ïn fraistubnja jah hlamma unhulþins jah lustuns managans unnutjans jah skaþulans þaiei saggqjand mans ïn frawardein jah fralust · Waurts allaize ubilaize ïst faihugeiro þizozei sumai gairnjandans afairzidai waurþun af galaubeinai jah sik silbans gaþiwaidedun sairam managaim :
11-12 Ïþ þu jai manna gudis þata þliuhais ïþ laistjais
· Garaihtein
· Gagudein
· Galaubein
· Friaþwa
· þulain
· Qairrein ·
Haifstei þo godon haifst galaubeinais · Undgreip libain aiweinon du þizaiei laþoþs ïs jah andhaihaist þamma godin andahaita ïn andwairþja managaize weitwode :
13 Anabiuda ïn andwairþja Gudis þis gaqiujandins alla jah xristaus Ïesuis þis weitwodjandins uf Paunteau Peilatau þata godo andahait fastan þuk þo anabusn unwamma ungafairinoda und qum fraujins unsaris Ïesuis xristaus · þanei ïn melam swesaim taikneiþ sa audaga jah ains mahteiga jah þiudans þiudanondane jah frauja fraujinondane · Saei ains aih undiwanein jah liuhaþ bauiþ unatgaht þanei saƕ manne ni ainshun nih saiƕan mag · · ·

Leave a Reply

Your email address will not be published. Required fields are marked *